Məhkəmə Ekspertizası Mərkəzi beynəlxalq elmi-praktiki konfransda iştirak edib
15 dekabr 2023-cü il tarixdə Azərbaycan Respublikası Daxili İşlər Nazirliyinin Polis Akademiyasında “Mülkiyyət əleyhinə törədilən cinayətlərin tədqiqinin cinayət-hüquqi, cinayət-prosessual və kriminalistik aspektləri” mövzusunda beynəlxalq elmi-praktiki konfrans keçirilib.
Tədbirdə Milli Məclisin, Baş Prokurorluğun, Ədliyyə Nazirliyi Məhkəmə Ekspertizası Mərkəzinin, Konstitusiya Məhkəməsi, Ali Məhkəmə nümayəndələri və ölkəmizin qabaqcıl ali təhsil müəssisələrinin professor-müəllim heyəti və tələbələri iştirak edib.
Həmçinin, hibrid formatında keçirilmiş konfransa Türkiyə, Rusiya, Moldova, Bolqarıstan, Gürcüstan və Qazaxıstan respublikalarının polis akademiyalarının rəhbər və professor-müəllim heyəti onlayn formatda qoşulub.
Konfrans iştirakçıları tədbirdən öncə Ümummilli lider Heydər Əliyevin xatirəsini hörmətlə yad edərək abidəsi önünə gül dəstələri qoyublar.
Konfransda çıxış edən Mərkəzin rəisi Elçin Qasımov tədbirə dəvətə görə Akademiyanın rəhbərliyinə minnətdarlığını bildirərək konfransın aktuallığına toxunub. Qeyd edib ki, mülkiyyət əleyhinə cinayətlərin sayının kifayət qədər yüksək olması, habelə müasir dünyanın qloballaşması, cinayətkarlığın transmilli sərhədləri aşması, ictimai həyatın rəqəmsallaşdırılması ilə bağlı yeni növ cinayətlərin üzə çıxması bu sahədə daha geniş kriminalistik və kriminoloji tədqiqatların aparılması zərurətini göstərir.
Konfransda Mərkəzin əməkdaşı Aysel Kişiyevanın “Oğurluq cinayətlərinin istintaqı zamanı təyin olunan kriminalistik ekspertizaların aparılmasını çətinləşdirən amillər” mövzusunda əyani təqdimatı böyük maraqla qarşılanıb.
Tədbir iştirakçıları mülkiyyət əleyhinə törədilən cinayətlərin tədqiqinin cinayət-hüquqi, cinayət-prosessual və kriminalistik aspektləri ilə bağlı müxtəlif təqdimatlarla çıxış ediblər.
Azərbaycan Respublikası Ədliyyə Nazirliyi
