Məhkəmə Ekspertizası Mərkəzi Özbəkistan Respublikası Ədliyyə Nazirliyinin təşkilatçılığı ilə keçirilən “Əsas hüquqlar əbədi dəyərlər kimi” mövzusunda “Tashkent Law Spring” III Beynəlxalq hüquq forumunda iştirak etmişdir.
Özbəkistan Respublikası Ədliyyə Nazirliyinin təşkilatçılığı ilə 17-18 may 2023-cü il tarixlərində Daşkənd şəhərində “Əsas hüquqlar əbədi dəyərlər kimi” mövzusunda “Tashkent Law Spring” III Beynəlxalq hüquq forumu keçirilib.
Forum Orta Asiyanın beynəlxalq əhəmiyyət kəsb edən tədbiri olmaqla xarici ölkələrin mütəxəssislərin iştirakı ilə iki ildə bir dəfə keçirilir. Forumda aktual hüquqi məsələlərin müzakirəsi, eləcə də ən yaxşı beynəlxalq təcrübə öyrənilməklə mübahisələrin optimal həll yolları barədə fikir mübadiləsi aparılmış, qabaqcıl beynəlxalq və xarici təcrübənin və elmi tədqiqatların nəticələrinin öyrənilməsi qanunvericiliyin və hüquq-mühafizə təcrübəsinin təkmilləşdirilməsi üçün müxtəlif ideyalar nəzərdən keçirilmişdir.
3-cü Forum çərçivəsində “Məhkəmə ekspertizasının inkişafının müasir meylləri” mövzusunda müzakirə sessiyası Özbəkistan Respublikası Ədliyyə Nazirliyi yanında X.Süleymanova adına Respublika Məhkəmə Ekspertizası Mərkəzində təşkil olunmuşdur. Azərbaycan Respublikası Ədliyyə Nazirliyi Məhkəmə Ekspertizası Mərkəzinin Keyfiyyət təminatı bölməsinin rəisi, ədliyyə müşaviri, hüquq elmləri üzrə fəlsəfə doktoru Cabir Ahmet “Standartlaşdırılmış məhkəmə ekspertizası fəaliyyəti sahəsində inteqrasiya problemləri” mövzusunda onlayn qaydada təqdimatla çıxış etmişdir.
Sessiyada müxtəlif ölkələrin ekspertiza idarələrinin fəaliyyət istiqamətləri, məhkəmə ekspertizası sahəsində qanunvericilik islahatları təcrübəsi, məhkəmə ekspertizası sahəsində tədqiqat və metodiki fəaliyyətlər, məhkəmə ekspertizası fəaliyyətinin standartlaşdırılması və keyfiyyətinin idarə edilməsi, məhkəmə ekspertizasının aktual problemləri, ekspertiza tədqiqatında xüsusi avadanlıq və proqramların rolu barədə təqdimatlar olmuş və müzakirələr aparılmışdır.
Nəticədə Forumun təşkilatçıları cəmiyyətdə qanunun aliliyinin möhkəmləndirilməsinə, habelə vətəndaşların hüquq və qanuni mənafelərinə qeyd-şərtsiz əməl olunmasının təmin edilməsinə yönəlmiş hüquq siyasətinin ardıcıl təkmilləşdirilməsi, müxtəlif ölkələrin məhkəmə ekspertizası qurumları arasındakı əməkdaşlığın inkişaf etdirilməsinin zəruriliyi barədə mövqelərini bildirmişlər.
Azərbaycan Respublikası Ədliyyə Nazirliyi
