Məhkəmə ekspertizası fəaliyyətinə həsr olunan tədbir keçirilib
Azərbaycan Respublikası Ədliyyə Nazirliyinin Məhkəmə Ekspertizası Mərkəzi və Naxçıvan Muxtar Respublikasının Məhkəmə Ekspertizası Mərkəzinin birgə təşkilatçılığı ilə oktyabr ayının 8-də Naxçıvan şəhərində “Naxçıvan Muxtar Respublikasında məhkəmə ekspertizasının səmərəli aparılmasının təmin edilməsi” mövzusunda tədbir təşkil olunub. Tədbirdə Mərkəz rəhbərliyi və müxtəlif ixtisaslar üzrə ekspertlər, muxtar respublikanın Ədliyyə Nazirliyinin rəhbərliyi, Mərkəz və hüquq-mühafizə orqanlarının əməkdaşları, hakimlər, eləcə də Naxçıvan Dövlət Universitetinin hüquqşünaslıq ixtisası üzrə tələbələri iştirak edib.
Naxçıvan Muxtar Respublikasının ədliyyə naziri Daşqın Rəhimov təşkil edilən tədbirin mahiyyətini və əhəmiyyətini xüsusi vurğulayaraq muxtar respublikada məhkəmə ekspertizasının yaranması və inkişaf perspektivləri barədə məlumat verib. Nazir çıxışında muxtar respublikanın mövcud coğrafi şəraiti nəzərə alınaraq ekspertizaların çevik aparılması, tədqiqatarın tam, hərtərəfli və obyektiv aparılmasının təmin edilməsi məqsədilə yüksək standartlara cavab verən müasir kriminalistik-texniki avadanlıqların alınması və ekspertlərin ixtisaslarının artırılması məqsədilə görülən işlər barədə məlumat verib. Tədbirin təşkil edilməsinin əsas məqsədinin ekspertiza fəaliyyətinin daha səmərəli həyata keçirilməsinin təşkili olduğunu bildirilib.
Məhkəmə Ekspertizası Mərkəzinin rəis müavini Rahim Rəhimov ölkəmizdə məhkəmə ekspertizasının təşkili məsələləri barədə ətraflı məlumat verərək ölkə başçısı tərəfindən bu sahədə aparılan islahatlardan bəhs edib. R.Rəhimov müasir dövrdə informasiya-kommunikasiya texnologiyalarının sürətli inkişafı, eyni zamanda iqtisadi mübahisələrin artması nəticəsində ekspertlərin iş yükünün artdığını və ekspertizaların fəaliyyət sahəsinin genişləndiyini qeyd edib. Məhkəmə Ekspertizası Mərkəzi ilə muxtar respublikanın analoji qurumu arasında ekspertlərin fərdi təcrübə keçmələri və təlimlərə cəlb edilməsi, eləcə də yeni texniki vasitələrin tətbiqinə dair beynəlxalq təcrübə mübadiləsi sahəsində qarşılıqlı fəaliyyəti barədə məlumat verilərək bu əməkdaşlığın metodiki və profilaktik işin səmərəli həyata keçirilməsi istiqamətində daha da gücləndirilməsinin zəruriliyi diqqətə çatdırılıb.
Tədbirin gedişatında Mərkəzin Ballistik və trasoloji ekspertizalar şöbəsinin rəis müavini Hacıbala Hacıyevin “Məhkəmə-ballistik, trasoloji və daktiloskopik ekspertizaların təyin edilməsinin xüsusiyyətləri”, Fiziki-kimyəvi ekspertizalar şöbəsinin rəisi Elvin Aslanovun “Narkotik vasitələrin ekspertizasının təyin edilməsi və aparılması məsələləri”, Yol-nəqliyyat hadisələrinin tədqiqi ekspertizaları şöbəsinin rəisi Vüqar Quliyevin “Yol-nəqliyyat hadisələrinin ekspertizasının aktual məsələləri” mövzusunda məruzələri dinlənilib.
Tədbir iştirakçılarından hüquq-mühafizə orqanları və məhkəmələrin nümayəndələrinin ekspertiza fəaliyyəti ilə bağlı təklifləri dinlənilib, müzakirələr aparılaraq iştirakçıları maraqlandıran suallar ekspertlər tərəfindən cavablandırılıb.
Sonda tədbir iştirakçılarına ekspertiza fəaliyyətindən bəhs edən metodiki vəsaitlər toplusu paylanılıb.
Azərbaycan Respublikası Ədliyyə Nazirliyi
