Məhkəmə Ekspertizası Mərkəzinin laboratoriyalarının müasir avadanlıqlarla komplektləşdirilməsi prosesi davam edir
Cari ilin 28-30 aprel tarixlərində Böyük Britaniyanın kriminalistik avadanlıqlar sahəsində qabaqcıl istehsalçısı olan “Foster+Freeman” şirkətinin Türkiyə Respublikasındakı rəsmi nümayəndəliyi tərəfindən Məhkəmə Ekspertizası Mərkəzində yeni alınmış “VSC 9000 markalı” video-spektral komparator və “Crime-Lite AUTO” cihazının funksional imkanları üzrə praktiki məşğələlər keçirilib.
Qeyd olunan komparator laboratoriya şəraitində sənədlərin tədqiqatının aparılması üçün nəzərdə tutulmuş yüksək texnologiyalı müxtəlif işıq mənbələri və spektral diapazonlardan istifadə ilə aşağıdakı məsələləri həll etmək imkanlarına malikdir:
- pasportlar, vizalar, pul əskinasları, aksiz markaları və digər qorunan sənədlərdə saxtakarlıq izlərinin aşkar edilməsi;
- sənəd üzərində düzəlişlərin və silinmələrin təyin olunması;
- gözlə görünməyən (ultrabənövşəyi və infraqırmızı diapazonlarda) elementlərin vizualizasiyası;
- mürəkkəb, kağız və digər materialların optik xüsusiyyətlərinin öyrənilməsi.
“Crime-Lite AUTO” cihazı isə portativ qurğudur və laboratoriyadan kənar şəraitdə kriminalistik tədqiqatlar üçün nəzərdə tutulub. Avadanlıq müxtəlif işıq mənbələri vasitəsilə sənədlərin həqiqiliyinin yoxlanılması, o cümlədən pasportlar, vizalar, pul əskinasları, aksiz markaları və digər qorunan sənədlərdə saxtakarlıqların aşkarlanması, düzəlişlərin, silinmələrin müəyyən edilməsi, gözlə görünməyən elementlərin tədqiq olunması və mürəkkəb, kağız, boya və mürəkkəbinin tərkibinin öyrənilməsində tətbiq edilir.
Azərbaycan Respublikası Ədliyyə Nazirliyi
