Ümummilli lider Heydər Əliyevin anadan olmasının 101-ci il dönümü
Məhkəmə ekspertizası mərkəzində qeyd olunub.
Müstəqil Azərbaycanın memarı və qurucusu Ümummilli Lider Heydər Əliyevin anadan olmasının 101-ci il dönümü Ədliyyə Nazirliyinin Məhkəmə ekspertizası mərkəzində dərin ehtiramla qeyd edilib.
Mərkəzin rəhbərliyi və kollektivi Fəxri xiyabanda Ulu öndər Heydər Əliyevin məzarını ziyarət edərək əziz xatirəsini anıblar.
Mərkəzdə keçirilən tədbirdə Ulu Öndərin əziz xatirəsi bir dəqiqəlik sükutla yad edilib. Tədbirdə çıxış edən Mərkəzin rəis müavini Elşən Albəndov Azərbaycan xalqı və dövlətinin tarixin səhnəsində özünəməxsus yer tutmasının, müstəqillik əldə edərək onun qorunub saxlanılmasının dahi şəxsiyyət, əbədiyaşar lider, Ulu öndər Heydər Əliyevin adı ilə bağlı olmasını qeyd edərək Ümummilli Liderin Azərbaycan xalqı qarşısında misilsiz xidmətlərindən, böyük xilaskarlıq missiyasından, hüquqi və demokratik dövlət quruculuğu istiqamətində həyata keçirdiyi uğurlu siyasətindən söz açıb, ölkəmizi dünyada tanınan nüfuzlu dövlətə çevirdiyini vurğulayıb.
Azərbaycana iki dəfə rəhbərlik etmək kimi tarixi bir missiyada hər zaman xalqına arxalanan Ulu Öndərin təməlini qoyduğu sosial-iqtisadi, siyasi, hərbi strategiyasının ölkə Prezidenti, Müzəffər Ali Baş Komandan İlham Əliyev tərəfindən uğurla davam etdirildiyi, Vətən müharibəsində qazanılan şanlı Zəfərlə ölkəmizin ərazi bütövlüyünün tam bərpa olunduğu diqqətə çatdırılıb.
Tədbirdə çıxış edən digər natiqlər bildiriblər ki, Ulu Öndərin müdrik siyasəti, dönməz əqidəsi və tarixi uzaqgörənliyi sayəsində müasir Azərbaycan formalaşıb, sürətlə inkişaf edir, daha da güclü və qüdrətli bir dövlətə çeviriləcək.
Tədbirdə Ulu Öndərin zəngin mənəvi və siyasi irsindən bəhs edən film nümayiş olunub.
Azərbaycan Respublikası Ədliyyə Nazirliyi
