Məhkəmə Ekspertizası Mərkəzində 31 Mart Azərbaycanlıların Soyqırımı Günü ilə əlaqədar tədbir keçirilib
Tədbir erməni vəhşiliyi nəticəsində qətlə yetirilmiş soyqırım qurbanlarının, torpaqlarımızın işğaldan azad edilməsi uğrunda canından keçən Şəhidlərimizin əziz xatirəsinin bir dəqiqəlik sükutla yad edilməsi ilə başladı.
Tədbirdə XIX əsrin əvvəllərindən başlayaraq Qafqazda kütləvi şəkildə məskunlaşdırılan ermənilərin “böyük Ermənistan” adlı qondarma ideyanın gerçəkləşməsi yolunda azərbaycanlılara qarşı törətdikləri qətliam və soyqırımı aktlarının zaman-zaman təkrarlandığı qeyd olundu.
Ötən əsrin əvvəllərində imperialist dairələrin birbaşa dəstəyi, həmçinin təşkilatçılığı ilə silahlı erməni millətçiləri və daşnak birləşmələri tərəfindən Bakıda, Şamaxıda, Qubada, Göyçayda, Lənkəranda, Salyanda, Zəngəzurda, Qarabağda, Naxçıvanda və digər bölgələrdə ağlagəlməz qətliamlar törədilmişdir. Təkcə 1918-ci ilin mart – iyul ayları ərzində 50 mindən çox soydaşımız xüsusi amansızlıqla qətlə yetirilmişdir.
Eyni zamanda 1998-ci il martın 26-da Ümummilli Lider Heydər Əliyev tərəfindən imzalanan “Azərbaycanlıların soyqırımı haqqında” Fərmanın proqram sənəd olduğu vurğulanaraq martın 31-nin ölkəmizdə Azərbaycanlıların Soyqırımı Günü səviyyəsində tarixləşdiyi diqqətə çatdırıldı.
Həmçinin qeyd olundu ki, Prezident İlham Əliyevin 30 dekabr 2009-cu il tarixli Sərəncamı ilə Azərbaycan xalqının gələcək nəsillərinin milli yaddaşına həkk olunması, soyqırımı qurbanlarının xatirəsini əbədiləşdirmək məqsədilə Quba Soyqırımı Memorial Kompleksi inşa edilmiş və erməni vəhşiliyinin əyani nümunələri ictimaiyyətə çatdırılmışdır.
Tədbirdə azərbaycanlıların soyqırımına həsr edilmiş sənədli film nümayiş olundu.
Azərbaycan Respublikası Ədliyyə Nazirliyi
