Ulu Öndərin əziz xatirəsi Məhkəmə Ekspertizası Mərkəzində dərin hörmət və ehtiramla yad edilib.
Dekabr 12-də Ədliyyə Nazirliyinin Məhkəmə Ekspertizası Mərkəzində xalqımızın ümummilli lideri, müasir Azərbaycan dövlətinin memarı və qurucusu Heydər Əliyevin əziz xatirəsinə həsr olunmuş anım tədbiri keçirilib.
Əvvəlcə ulu öndərin əziz xatirəsi bir dəqiqəlik sükutla yad edilib. Mərkəzin rəis müavini vəzifəsini icra edən Rahim Rəhimov tədbiri giriş sözü ilə açaraq ulu öndərin Azərbaycana rəhbərlik etdiyi bütün dövrlərdə xalqına şərəflə xidmət etməsindən, 90-cı illərin əvvəllərində tənəzzülə doğru yuvarlanan, dağılmaq ərəfəsində olan Azərbaycanı necə xilas etməsindən danışıb.
R.Rəhimov çıxışında qeyd etdi ki, ulu öndər bütün xidmətləri ilə yanaşı, layiqli siyasi davamçısı olan Prezident İlham Əliyevi müdrik bir siyasətçi kimi yetişdirərək xalqımıza bəxş etmiş və müzəffər Ali Baş Komandan tərəfindən Heydər Əliyevin məqsədyönlü siyasi xətti uğurla həyata keçirilməklə müstəqil respublikamız yeni inkişaf mərhələsinə yüksəlmişdir.
Daha sonra çıxış üçün söz əməkdar elm xadimi, professor Qəzənfər Paşayevə verilib. Qəzənfər Paşayevin ulu öndərin Azərbaycan ədəbiyyatının və mədəniyyətinin inkişafına verdiyi töhfələrdən bəhs edən geniş məzmunlu çıxışı Mərkəzin kollektivi tərəfindən rəğbətlə qarşılanıb.
Sonra tarix üzrə fəlsəfə doktoru, dosent Vasif Qafarov məruzə ilə çıxış edərək ümummilli lider Heydər Əliyevin dahi şəxsiyyət kimi tarixdə xüsusi iz qoymasından, müasir Azərbaycan tarixinin 1969-2003-cü illərini əhatə edən dövrünün yaddaşlarda “Heydər Əliyev dövrü” kimi həkk olunmasından danışdı.
Tədbirin sonunda ulu öndərin xatirəsinə həsr olunmuş filmə baxıldı.
Azərbaycan Respublikası Ədliyyə Nazirliyi
